Səfirlik əməkdaşları Marneulidə 20 Yanvar abidəsini və şəhid ailəsini ziyarət ediblər (FOTO-VİDEO)

Azərbaycanın Gürcüstandakı səfirliyinin əməkdaşları 20 Yanvar faciəsinin 36-cı ildönümü ilə əlaqədar Marneuli bələdiyyəsinin Algeti kəndində yerləşən, 20 Yanvar və 9 Aprel şəhidlərinin şərəfinə ucaldılmış abidəni ziyarət edib və önünə gül dəstələri düzüblər. 24News.ge xəbər verir ki, abidə ətrafında 20 Yanvar faciəsini əks etdirən fotoşəkillər də nümayiş olunub. Anım mərasimində çıxış edən natiqlər gənclərə bu önəmli günün tarixi haqqında ətraflı məlumat verib, 20 Yanvar şəhidlərinin qanları bahasına tarixə adlarını yazdıqlarını qeyd ediblər. Daha sonra səfirlik əməkdaşları Kirəc Muğanlı kəndində şəhid Vəfadar Eminovun doğulub boya-başa çatdığı evə baş çəkib, şəhidin ailə üzvləri və yaxınları ilə söhbət ediblər. Şəhidin adına müqəddəs qurani kərimdən ayələr oxunub və onun yaxınları həyat yolundan danışıb. Bildirilib ki, Vəfadar Eminov hələ məktəbdə oxuduğu illərdən xalqa və vətənə sevgisi ilə seçilib. Bakı Dövlət Universitetinə qəbul olunduqdan sonra azadlıq hərəkatına qoşulub və onun fəal üzvlərindən biri olub. V. Eminov 20 Yanvar hadisələri zamanı keçmiş sovet ordusu əsgərlərinə qarşı mübarizədə ön sıralarda yer alıb. 1990-cı il yanvarın 22-də yaralılar üçün keçirilən qanvermə aksiyasında iştirak edib və xəstəxanadan çıxarkən mənfur düşmənin açdığı atəş nəticəsində şəhidlik zirvəsinə ucalıb. Şəhidin ailə üzvləri göstərilən diqqət və qayğıya görə Azərbaycan Prezidentinə və səfirliyə minnətdarlıqlarını bildiriblər.

www.24news.ge

Səfirlik əməkdaşları Marneulidə 20 Yanvar abidəsini və şəhid ailəsini ziyarət ediblər (FOTO-VİDEO)

Digər xəbərlər