"İrana qarşı hər hansı bir xarici hərbi müdaxiləyə qarşıyıq" - Hakan Fidan

"Türkiyə İrana qarşı hərbi müdaxilənin əleyhinədir və əsas prioritet kimi regionda destabilləşmənin qarşısının alınmasını görür". 24News.ge xəbər verir ki, bu barədə Türkiyənin xarici işlər naziri Hakan Fidan İstanbulda keçirdiyi mətbuat konfransında bildirib. Nazirin sözlərinə görə, Ankara yaranmış vəziyyətin həlli üçün diplomatik təşəbbüsləri davam etdirəcək və İranla ABŞ arasında münaqişənin dialoq yolu ilə sona çatacağına ümid edir: “Biz İranda hərbi müdaxiləyə qarşıyıq. İran öz daxili problemlərini müstəqil şəkildə həll etməlidir. Prioritetimiz güc tətbiqinə gətirib çıxara biləcək istənilən ssenarinin qarşısını almaqdır. Problemlərin dialoq yolu ilə həll olunmasını istəyirik. İranda genişmiqyaslı destabilləşmə region üçün çox ciddi nəticələr yarada bilər”, – deyə Hakan Fidan vurğulayıb. Medianın məlumatına görə, Hakan Fidan son günlərdə iki dəfə iranlı həmkarı Abbas Araqçi ilə telefon danışığı aparıb. Danışıqlar zamanı regional gərginliyin azaldılması üçün diplomatik müzakirələrin vacibliyi önə çəkilib. Türkiyənin diplomatik mənbələri bildiriblər ki, Tehran və Vaşinqton arasında birbaşa əlaqələrin dayanması fonunda Ankara ABŞ rəsmiləri ilə də təmaslarını davam etdirir. Qeyd edək ki, Tehran əvvəllər qonşu ölkələri, o cümlədən Türkiyəni xəbərdar edərək bildirib ki, əgər ABŞ İrana zərbə endirərsə, Yaxın Şərqdə yerləşən Amerika hərbi bazalarına cavab zərbələri endiriləcək.

www.24news.ge

"İrana qarşı hər hansı bir xarici hərbi müdaxiləyə qarşıyıq" - Hakan Fidan

Digər xəbərlər