Baş nazir Gürcüstanda 6,6 milyard dollar dəyərində tikinti layihəsini həyata keçirəcək şirkətin qurucusu ilə görüşüb

Baş nazir İrakli Kobaxidze dünyada aparıcı şirkətlərdən biri olan “Eagle Hills”in qurucusu Məhəmməd Əlabarla görüşüb. 24News.ge xəbər verir ki, bu barədə məlumatı Hökumət Administrasiyası yayıb. Bildirilir ki, şirkət Gürcüstanda ümumi dəyəri 6,6 milyard ABŞ dolları olan ölkə tarixinin ən iri investisiya layihəsini həyata keçirir. Görüş zamanı layihənin konkret aspektləri müzakirə edilib. Baş nazir bu investisiya layihəsinin ölkə iqtisadiyyatı üçün xüsusi əhəmiyyət daşıdığını vurğulayaraq, onun iqtisadi inkişafa yeni stimul verəcəyini qeyd edib. Bildirilib ki, “Eagle Hills”in Krtsanisi və Qonio ərazilərində həyata keçirdiyi layihə çərçivəsində beynəlxalq standartlara cavab verən müasir infrastruktur yaradılacaq. Bu infrastruktur həm Gürcüstan vətəndaşları, həm də ölkəyə səfər edən qonaqlar üçün yüksək səviyyəli mühit təmin edəcək. Layihənin tikinti mərhələsində 24 mindən çox, tikinti işləri başa çatdıqdan sonra isə 8 mindən artıq daimi iş yerinin yaradılması nəzərdə tutulur. Şirkətin siyasətinə əsasən, layihənin icrası əsasən gürcü tikinti şirkətləri tərəfindən həyata keçiriləcək ki, bu da yerli biznes sektorunun inkişafına töhfə verəcək. Rəsmi məlumata görə, layihənin Gürcüstan iqtisadiyyatına birbaşa təsiri 11 milyard lari təşkil edəcək. Görüşdə iqtisadiyyat və dayanıqlı inkişaf naziri Mariam Kvrivişvili də iştirak edib.

www.24news.ge

Baş nazir Gürcüstanda 6,6 milyard dollar dəyərində tikinti layihəsini həyata keçirəcək şirkətin qurucusu ilə görüşüb

Digər xəbərlər