“İlin nominasiyaları” üzrə mükafatların təqdimetmə mərasimi keçirilib (VİDEO)

"Lider Media" təşkilatı və 24News.ge xəbər portalının Gürcüstan azərbaycanlıları arasında təsis etdiyi “İlin nominasiyaları” üzrə mükafatların təqdimetmə mərasimi keçirilib. Tədbirdə ictimaiyyət nümayəndələri, müəllimlər, bələdiyyə üzvləri, jurnalistlər, ziyalılar, din xadimləri və gənclər iştirak ediblər. Mükafat on nominasiya üzrə Gürcüstan azərbaycanlıları arasında il ərzində öz fəaliyyətləri ilə aktiv şəkildə seçilən şəxslərə təqdim olunub. Tədbirə ev sahibliyi edən "Lider Media" təşkilatının və 24News.ge xəbər portalının təsisçisi Azər Məmmədov ilk öncə qonaqları salamlayaraq qarşıdan gələn Yeni İl və Dünya Azərbaycanlılarının Həmrəyliyi Günü münasibəti ilə təbrik edib və 2025-ci ilin azərbaycan xalqı üçün mühüm il olduğunu qeyd edərək növbəti ilin də uğurlu olmasını arzu edib. A. Məmmədov çıxışında artıq üç ildir ki, təsis edilən ilin mükafatı nominasiyası barədə qonaqlara məlumat verib və bildirib ki, il ərzində media öz müşahidələrini aparıb və Gürcüstan azərbaycanlıları arasında öz fəaliyyətləri ilə aktiv şəkildə seçilən şəxslərə sözügedən nominasiyaların təqdim edilməsi qərarı alınıb. O qeyd edib ki, bütün sahələr üzrə aktiv icma üzvlərimiz olsa da lakin mükafata gürcü cəmiyyəti arasında, mərkəzi medialarda və həmçinin beynəlxalq tədbirlərdə Gürcüstan azərbaycanlılarını təmsil edən şəxslər layiq görülüb. O, bu mükafatın təsis edilməsində əsas məqsədin icmamız arasında daha da aktivliyin təşviq edilməsinin olduğunu qeyd edib. A. Məmmədov sözügedən mükafatın hər il bir ənənə olaraq dekabr ayının sonunda təqdim ediləcəyini qonaqların diqqətinə çatdırıb. Tədbirin davamında çıxış edən digər ali qonaqlar da bu kimi nominasiyanın Gürcüstan azərbaycanlılarının gürcü cəmiyyətinə inteqrasiyasında və öz sahələri üzrə aktiv fəaliyyətlər göstərməsində bir stimul olacağını qeyd ediblər. Qonaqlar bölgədə geniş oxucu və tamaşaçı auditoriyasına malik olan 24News.ge xəbər portalının və 24News Tv internet televiziyasının 2018-ci ildən bu günədək müxtəlif sahələr üzrə təqdirə layiq fəaliyyətləri olduğunu qeyd ediblər. Sonra on nominasiya üzrə Gürcüstan azərbaycanlıları arasında il ərzində öz fəaliyyətləri ilə aktiv şəkildə seçilən şəxslərə mükafatlar təqdim olunub: ● İlin rəqs müəlliməsi nominasiyasına uzun illərdir milli rəqslərimizin öyrədilməsi və təbliğində böyük xidmətləri olan “Sarvan” rəqs qrupunun rəhbəri Cəmilə Məmmədova layiq görülüb. ● İlin xanım polisi nominasiyasına polis mayoru Nurlana Əhmədova layiq görülüb. ● İlin ən çox bal toplayan tələbəsi nominasiyasında Jalə Həsənova mükafatlandırılıb. ● İlin aşığı nominasiyasına ustad aşıq, Aşıq Əmrahın yadigarı, 85 yaşlı qocaman el sənətkarı Aşıq Məsim Şamilov layiq görülüb. ● İlin tar ifaçısı nominasiyasına paytaxt Tbilisidə və bölgələrdə milli musiqimizi təbliğ edən Ramin Pirməmmədov layiq görülüb. ● İlin aktiv müəllimi nominasiyasına öz əsas fəaliyyətindən əlavə könüllü olaraq gənclərə incəsənəti aşılayan, xüsusi tamaşaların hazırlanmasında mühüm rolu olan Esmira Ələkbərli layiq görülüb. ● İlin aktiv təşkilat rəhbəri nominasiyasına Bolnisi şəhərində və müxtəlif kəndlərdə bir sıra təhsil mərkəzlərinin fəaliyyətə başlamasında, eləcə də təhsil sahəsində uğurlu xidmətlər göstərən Rezo Həsənov layiq görülüb. ● İlin solisti nominasiyasında Gürcüstanda və xarici ölkələrdə həm gürcü, həm də Azərbaycan xalqına məxsus musiqiləri məharətlə ifa və təbliğ edən Marneuli Mədəniyyət Evinin solisti Şaban Məmmədov layiq görülüb. ● İlin futbol müəllimi nominasiyasına uzun illərdir gənclərin bu sahəyə marağının artırılmasında, eləcə də onların bir sıra yerli və xarici klublarda təmsil olunmasında böyük xidmətləri olan Əhməd İsmayılov layiq görülüb. ● İlin xalça ustası nominasiyasına Borçalı xalçaçılıq ənənələrinin unudulmaması üçün böyük zəhmətlər çəkən, gənclərə bu sənətin öyrədilməsində və xalçalarımızın bir sıra beynəlxalq tədbirlərdə təbliğində xüsusi xidmətləri olan Nabat Anazarova layiq görülüb. Qeyd edək ki, tədbir sonda “Melody” və “Paxlava” şirniyyat evlərinin dəstəyi ilə milli mətbəximizə aid şirniyyatlar və çay süfrəsi arxasında təqdim olunan konsert proqramı ilə davam edib.

www.24news.ge

“İlin nominasiyaları” üzrə mükafatların təqdimetmə mərasimi keçirilib (VİDEO)

Digər xəbərlər