Şeyx Hacı Faiq Nəbiyev İraqa səfəri çərçivəsində bir sıra görüşlər keçirib və ziyarətlərdə olub (FOTO)

Bütün Gürcüstan Müsəlmanları İdarəsinin (BGMİ) Şeyxi Hacı Faiq Nəbiyev İraqa səfəri çərçivəsində bir sıra görüşlər keçirib və ziyarətlər edib. 24News.ge xəbər verir ki, bu barədə onun sosial media hesabında məlumat paylaşılıb. Məlumata əsasən, səfər çərçivəsində Alulbeyt Alimlər Birliyinin İdarə Heyətinin üzvü Hacı Faiq Nəbiyev Birliyin digər üzvləri ilə birlikdə Həzrət Abbas (ə) Ziyarət Kompleksinin məsul şəxsləri ilə görüş keçirib. Görüş zamanı elm, dini fəaliyyətlər, təhsil layihələri və birgə əməkdaşlıq imkanları ətrafında fikir mübadiləsi aparılıb. Həzrət Abbas (ə) Ziyarət Kompleksinin nümayəndələri Kərbəla ziyarətgahlarının fəaliyyəti, yenilənmiş infrastruktur və göstərilən dini xidmətlər barədə ətraflı məlumat veriblər. Şeyx Hacı Faiq Nəbiyev Kərbəlada Ayətullah Sistaninin nümayəndəsi, İmam Hüseyn (ə) Ziyarətgahının şəri qəyyumu Şeyx Əbdül Mehdi Kərbəlayi ilə də görüş keçirib. Görüş zamanı müqəddəs ziyarətgahların fəaliyyəti, dini-ictimai məsələlər, eləcə də İslam ümməti arasında birlik və həmrəyliyin gücləndirilməsi mövzularında fikir mübadiləsi aparılıb. 25 ildir Gürcüstanda Alulbeyt Təşkilatına rəhbərlik edən Hacı Faiq Nəbiyev Kərbəlada Alulbeyt Təşkilatının Kərbəla üzrə rəhbəri Seyid Abbas Şəhristani ilə də görüşüb. Görüşdə Təşkilatın həyata keçirdiyi genişmiqyaslı dini, elmi və sosial layihələr, Gürcüstandakı ümumi islamı vəziyyət, dini icmaların fəaliyyəti və mövcud çağırışlar müzakirə olunub. Tərəflər Əhli-beyt məktəbinin dəyərlərinin qorunmasının və bu istiqamətdə beynəlxalq əməkdaşlığın gücləndirilməsinin vacibliyini vurğulayıblar. Hacı Faiq Nəbiyev səfər çərçivəsində Nəcəf şəhərində yerləşən İmam Əli (ə) Ziyarətgah Kompleksini də ziyarət edib. Onu Ziyarətgah Kompleksinin Baş katibi Seyid İsa Xarsan qarşılayıb. Daha sonra Şeyx Hacı Faiq Nəbiyev və Alulbeyt Alimlər Birliyinin üzvləri ziyarətgahın hərəmini ziyarət ediblər. Ardınca Şeyx Hacı Faiq Nəbiyev Ziyarətgahın Protokol və Təşrifat İdarəsinin rəhbəri Heydər Həkimlə görüş keçirib. Görüş zamanı müqəddəs məkanın idarə olunması, təşkilati məsələlər, həmçinin Gürcüstandan olan zəvvarların Nəcəf və Kərbəlaya səfərlərinin daha rahat və səmərəli təşkili mövzularında fikir mübadiləsi aparılıb. Şeyx Hacı Faiq Nəbiyev İraqa səfəri çərçivəsində Ayətullah Sistaninin tam səlahiyyətli nümayəndəsi Ayətullah Şəhristaniyə bağlı Nəcəf şəhərində yerləşən Əmirəlmöminin (ə) Xəstəxanasını da ziyarət edib. Burada ona xəstəxananın fəaliyyəti, göstərilən tibbi xidmətlər, sosial yönümlü layihələr, eləcə də ehtiyaclı xəstələrə pulsuz və güzəştli müalicə imkanları barədə ətraflı məlumat verilib. BGMİ-nin Şeyxi həmçinin Beynəlxalq Alulbeyt Təşkilatının Nəcəfşbəsinin müdiri Hacı Ehsan Cəvahiri ilə görüş keçirib. Görüş zamanı Alulbeyt irsinin təbliği, dini-elmi əməkdaşlığın genişləndirilməsi, eləcə də Gürcüstan və İraq arasında dini-mədəni əlaqələrin inkişafı məsələləri müzakirə olunub. Tərəflər qarşılıqlı təcrübə mübadiləsinin əhəmiyyətini vurğulayıblar. Səfər çərçivəsində Şeyx Hacı Faiq Nəbiyev Nəcəfül-Əşrəfdə yerləşən Ayətullah Xoi Elmi Mərkəzində olub və mərkəzin rəhbəri Dr. Seyid Cavad Xoi ilə görüşüb. Görüş zamanı Şeyx Hacı Faiq Nəbiyev çıxış edərək İslam dünyasında vəhdət və birliyin əhəmiyyətindən danışıb. O qeyd edib ki, vəhdət sadəcə taktiki yanaşma deyil, strateji baxış tələb edən uzunmüddətli bir prosesdir və bu istiqamətdə sistemli fəaliyyət vacibdir.

www.24news.ge

Şeyx Hacı Faiq Nəbiyev İraqa səfəri çərçivəsində bir sıra görüşlər keçirib və ziyarətlərdə olub (FOTO)

Digər xəbərlər