ევროკავშირი საქართველოს და სომხეთსა შორის ახალი ელექტროგადამცემი ხაზის პროექტში 500 მლნ ევროს ჩადებს

ევროკავშირი სომხეთის ენერგეტიკული უსაფრთხოების დივერსიფიკაციასა და გაძლიერებაში 500 მლნ ევროს ჩადებს, რაც სომხეთსა და საქართველოს შორის ახალი ელექტროგადამცემი ხაზის მშენებლობას ითვალისწინებს. ამის შესახებ ევროკავშირის გაფართოების პოლიტიკის ევროკომისარ მარტა კოსმა განაცხადა, რასაც სააგენტო „არმენპრესი“ ავრცელებს. მისი თქმით, „ევროკავშირი ამ სფეროში გერმანიის განვითარების ბანკ KfW-სთან თანამშრომლობს.“ კავკასიის ელექტროგადამცემი ქსელის პროექტის მიზანი სომხეთისა და საქართველოს ელექტროქსელების სინქრონიზაციის გზით ამიერკავკასიაში ენერგიის ტრანსსასაზღვრო გაცვლის უზრუნველყოფაა. „ეს არის 500 მლნ ევროს ინვესტიცია სომხეთის ენერგეტიკული სისტემის საქართველოსთან დასაკავშირებლად და ჩვენ უკვე ვმუშაობთ სომხეთ-თურქეთის ენერგეტიკულ სისტემაზეც, რომ თქვენ რუსულ ენერგიაზე ნაკლებად იყოთ დამოკიდებული,“ - ამბობს მარტა კოსი. ახლახან ტაშკენტში ხელი მოეწერა დოკუმენტს, რომელიც კავკასიის ელექტროგადამცემი ქსელის პროექტის ფარგლებში ენერგეტიკული ინფრასტრუქტურის გასაუმჯობესებლად, ენერგეტიკული უსაფრთხოებისა და დივერსიფიკაციის გასაძლიერებლად, ასევე, გარე მოთამაშეებზე დამოკიდებულების შესამცირებლად სომხეთს მხარდაჭერას უწევს. ხელმოწერილი პროექტის ღირებულება 500 მლნ ევროს შეადგენს. ამჟამად სომხეთისა და საქართველოს ენერგოსისტემები სხვადასხვა სინქრონულ ზონაში ფუნქციონირებს. კერძოდ, სომხეთის ქსელი ირანთან, ხოლო საქართველოს ქსელი რუსეთთან არის დაკავშირებული. ამდენად, მათ შორის ელექტროენერგიის გასაცვლელად საჭირო არის ახალი, მუდმივი დენის გადამცემი ხაზის მშენებლობა, რაც არსებულ შეზღუდვებს მოხსნის და ელექტროენერგიით ვაჭრობის წინაპირობებს შექმნის. მართალია, საქართველოსა და სომხეთს შორის 220 კვ და 110 კვ ძაბვის გადამცემი რამდენიმე ხაზი მოქმედებს, თუმცა ისინი ელექტროენერგიის ეფექტური გაცვლისთვის არასაკმარისია. ამდენად, ამ ეტაპზე ქვეყნებს შორის საზღვარზე მუდმივი დენის ახალი, 400 კვ მაღალი ძაბვის გადამცემი ხაზის მშენებლობის პროექტი განიხილება.

www.24news.ge

ევროკავშირი საქართველოს და სომხეთსა შორის ახალი ელექტროგადამცემი ხაზის პროექტში 500 მლნ ევროს ჩადებს

სხვა სიახლეები