Xarici İşlər Nazirliyi Avropa Komissiyasının Hesabatını tənqid edib

Gürcüstanın Xarici İşlər Nazirliyi Avropa Komissiyasının genişlənmə siyasəti və Gürcüstanla bağlı hesabatını tənqid edib. 24News.ge-nin məlumatına görə, nazirliyin bəyanatında bildirilir ki, hesabat Gürcüstanla bağlı əsassız mənfi qiymətləndirmələr səsləndirmək və siyasi spekulyasiyalar üçün istifadə olunur. Xarici İşlər Nazirliyi Avropa İttifaqı institutlarının Gürcüstanla bağlı bəzi addımlarını və bəyanatlarını narahatlıq doğuran hesab edir. Nazirliyin açıqlamasına görə, bu addımlar ölkənin daxili siyasətinə təsir göstərmək məqsədini daşıyır və həm Gürcüstan–Aİ münasibətlərinin ruhuna, həm də ümumi maraqlara ziddir. Bəyanatda qeyd olunur ki, Gürcüstan Aİ-yə üzvlük məsələsinin siyasi alət kimi istifadə edilməsinə yönəlmiş bütün cəhdləri qınayır və bu cəhdlərin ölkə ilə Aİ arasındakı münasibətlərə zərər vurduğunu bildirir. Xarici İşlər Nazirliyi həmçinin vurğulayıb ki, Gürcüstan Avropa İttifaqı ilə bağlanmış sazişlərə sadiqdir və Assosiasiya Müqaviləsi çərçivəsində öhdəliklərini vicdanla yerinə yetirərək ölkənin Avropa standartlarına yaxınlaşmasını təmin edir. Bəyanatda qeyd olunur ki, Avropa Komissiyasının hesabatında yerli özünüidarə seçkiləri zamanı baş verən hadisələr qərəzli şəkildə qiymətləndirilib. Nazirlik xüsusilə Tbilisidə oktyabrın 4-də keçirilmiş seçkilər zamanı Avropa İttifaqı institutlarının Gürcüstan dövlət institutlarına edilən hücum və zorakılığı görməməzliyə vurmasını tənqid edib. Gürcüstan tərəfi bütün beynəlxalq reytinqlərə görə hökumətin səmimiliyi, bürokratiya və korrupsiyaya qarşı mübarizə, idarəetmənin effektivliyi sahələrində irəliləyiş olduğunu və ölkədə stabil makroiqtisadi mühitin, yüksək iqtisadi artımın davam etdiyini vurğulayır. Bildirilir ki, bütün bunlara baxmayaraq, Avropa Komissiyasının hesabatındakı qiymətləndirmələrin obyektivliyi sual altındadır. Nazirlik hökumətin Avropa İttifaqı ilə konstruktiv, qarşılıqlı faydalı və dəyərlərə əsaslanan əməkdaşlığa sadiqliliyini bir daha təsdiqlədiyini bildirib.

www.24news.ge

Xarici İşlər Nazirliyi Avropa Komissiyasının Hesabatını tənqid edib

Digər xəbərlər