Şeyx Hacı Faiq Nəbiyev, Baş Nazirin 'Məhəmməd' adı ilə bağlı səsləndirdiyi fikirlərə münasibət bildirib

Bütün Gürcüstan Müsəlmanları İdarəsinin Şeyxi Hacı Faiq Nəbiyev, Baş Nazir İrakli Kobaxidzenin Gürcüstanın İctimai Televiziyasında səsləndirdiyi fikirlərə münasibət bildirib. 24News.ge xəbər verir ki, bu barədə Şeyx Facebook sosial media hesabında paylaşım edib. O qeyd edib ki, "Məhəmməd" adı İslam peyğəmbərinə məxsus olduğu üçün adın ictimai diskussiyalarda çəkilməsi zamanı həssaslıq göstərilməlidir ki, müsəlmanların hisslərinə toxuna biləcək yanlış təəssürat yaranmasın: "Baş Nazir Avropada miqrasiya problemlərindən danışarkən “Məhəmməd” adını qeyd etmişdir. Bu ifadə müsəlman icmasında müəyyən anlaşılmazlıq və bəzi hallarda narahatlıq yaratmışdır. Mən, Bütün Gürcüstan Müsəlmanları İdarəsinin Şeyxi olaraq, bu məsələ ətrafında cəmiyyətdə yaranmış reaksiyanı anlayıram. “Məhəmməd” adı dünyanın bir çox ölkələrində ən çox yayılmış adlardan biridir. Bu ad Məhəmməd Peyğəmbərə (s) olan sevgi, mənəvi saflıq və xeyirxahlıqla əlaqələndirilir. Bu səbəbdən, belə bir adın ictimai diskussiyalarda çəkilməsi zamanı həssaslıq göstərilməlidir ki, müsəlmanların hisslərinə toxuna biləcək yanlış təəssürat yaranmasın. Eyni zamanda, biz inanırıq ki, səsləndirilmiş ifadə kontekstdən çıxarılmışdır və cənab İrakli Kobaxidzenin fikirləri nə İslama, nə də dünya müsəlmanlarına qarşı yönəlməmişdir. Biz Gürcüstanda mövcud olan dini azadlıqlar mühitini, dövlətin tolerant siyasətini və bütün dini icmalara bərabər münasibət prinsipini yüksək qiymətləndiririk. Baş Nazir tərəfindən Ramazan aylarında iftar süfrələrinin təşkili, Qurban bayramı münasibətilə məscidlərə səfərlər və müsəlman vətəndaşlarla görüşlər, həmçinin Dini Məsələlər üzrə Dövlət Agentliyi vasitəsilə müsəlman icmalarının sosial və dini məsələlərinə göstərilən diqqət bu siyasətin bariz nümunələrindəndir. Bu münasibətlərin davamlılığı və möhkəmləndirilməsi Gürcüstan cəmiyyətinin birliyi və sabitliyi üçün mühüm əhəmiyyət daşıyır. Gürcüstan həmişə müxtəlif din və etnik qrupların harmonik birgəyaşayışı ilə seçilmişdir və gələcəkdə də bu ənənə davam edəcəkdir. Müsəlman vətəndaşlar bu müxtəlifliyin ayrılmaz hissəsidir və ölkənin inkişafına və ümumi rifaha fəal şəkildə töhfə verirlər. Allahdan bütün dünyaya, xüsusilə Gürcüstanımıza sülh, əminamanlıq və rifah arzu edirəm", - deyə Hacı Faiq Nəbiyev qeyd edib.

www.24news.ge

Şeyx Hacı Faiq Nəbiyev, Baş Nazirin 'Məhəmməd' adı ilə bağlı səsləndirdiyi fikirlərə münasibət bildirib

Digər xəbərlər